 حەسەنی کوڕی علی (رضي اللە عنهما) لە چەند دێڕێکدا
خێزانەکانی:
١-خەولەی کچی مەنزور.
٢- ئوم بشیری کچی ئەبو مەسعود.
٣- ئوم ئیسحاقی کچی تەڵحەی کوڕی عوبیدواللە.
و بەناوبانگە کە حەسەن زۆرێکی خواستووە و زۆرێکیشی تەڵاق داوە.
منداڵەکانی:
کوڕەکان: حەسەن – زەید – حوسەین – عبداللە – ئەبوبکر – عبدالرحمن – القاسم – عەمر – محمد.
کچەکانی: ئوم حەسەن – ئوم عبداللە.
فەزڵەکانی:
لە ئەبی بەکرەوە ئەڵێ: گوێم لە پەیامبەری خوا بوو ﷺ لەسەر مینبەرەوە، حەسەن لە تەنیشتیەوە بوو، جارێک تەماشای خەڵکەکەی دەکرد و جارێک تەماشای حەسەن، دەیفورموو: (ئەم کوڕەم گەورە و بەڕێزە، بەڵکو خوا بیکاتە هۆی ئاشتەوایی نێوان دوو کۆمەڵی موسڵمانان).
لە ئوسامەی کوڕی زەیدەوە، کەوا پێغەمبەری خوا ﷺ خۆی و حەسەنی دەگرت و دەیفەرموو: (ئەی خودایە من خۆشیانم دەوێ، تۆش خۆشیانت بووێ).
لە عوقبەی کوڕی حارسەوە ئەڵێ: ئەبو بەکرم بینی، حەسەنی لە ئامێز بوو و دەیووت: (باوکم بەقوربانی بێ، شێوەی هەر لە پەیامبەر دەچێ و لە عەلی ناچێ، عەلیش پێدەکەنی).
وەفاتی:
لەماوەی خەلافەتی موعاویەدا بوو لە ساڵی ٤٩ ك حەسەنی کوڕی عەلی (رضي اللە عنهما) وەفاتی کرد.
عومەیری کوڕی ئیسحاق ئەڵێ: من و برادەرێکم چووین بۆلای حەسەنی کوڕی عەلی سەردانێکی بکەین، بە هاوڕێکەم وت: ئەی فڵان کەس پرسیارم لێبکە.
ئەویش پێی ووت: هیچت لێ ناپرسم، پاشان هەستا و ڕۆیشتە ژوورەکەیەوە و دیسانەوە هاتە دەرێ و وتی: ئەی فڵان کەس پرسیارم لێبکە پێش ئەوەی ڕۆژێک بێت نەبم تا لێم بپرسی، دە بەخوا وە چەند جار ژەهر خوارد کراوم، بەڵام وەکو ئەمە کاری تێنەکردووم، لێم بپرسە.
ئەویش ووتی: هیچت لێ ناپرسم، ان شاء اللە خوا شیفات دەدات، [ئەوجا پرسیارت لێ دەکەم].
دوایی هەستاین و بەیانییەکەی سەردانیم کرد، بینیم لەسەرەمەرگدایە، حوسێن هاتە لای سەری و دانیشت، وتی: برام پێم بڵێ کێ دەرخواردی دایت؟
وتی: بۆ دەیکوژی؟
وتی: بەڵێ.
ئەویش وتی: پێت ناڵێم، ئەگەر ئەوە بێت کە خۆم ئەیناسم ئەوە خوای گەورە تۆڵەی سەختترە، گەر نا سوێند بەخوا هەرگیز ڕێگە نادەم بێ تاوانێک لەجیاتم بکوژرێت.
گوتراویشە: ئەوەی ژەهرەکەی پێداوە، خێزانەکەی خۆی بووە (جەعدەی کچی ئەشعەس) بەڵام ئیسپات نەبووە.
زەهەبی ئەڵێ: (ئەمە شتێکی ڕاست نییە، ئەمە کێ بینی؟).
ئیبن کەسیریش ئەڵێ: (بەڕای منیش ئەمە شتێکی ڕاست نییە).
______________________________________________
سەرچاوە:
کتێبی: حقبة من التاریخ مابین وفاة الرسول ﷺ الی مقتل الحسین (رضي اللە عنە) سنة ٦١ هـ.
نوسینی:
عثمان محمد الخمیس.
|